कञ्चनपुर। कञ्चनपुरमा बाढीले बगाएको नेपाल–भारत सीमा स्तम्भ १० वर्षसम्म पनि बन्न सकेका छैनन्। २०७० असार २ गते महाकाली नदीमा आएको बाढीले बगाएका नेपाल–भारत सीमास्थित ८०५ नम्बरको मुख्य पिल्लर अहिलेसम्म अझै बन्न नसकेको हो।
महाकाली नदीमा आएको बाढीले मुख्य सीमा स्तम्भसँगै भीमदत्त नगरपालिका–११ स्थित चौकीसोता क्षेत्रमा ठूलो क्षति पुर्याएको १० वर्ष पुगेको छ । सीमा स्तम्भसँगै महाकाली जनज्योति प्राविको भवन समेत पूर्णरूपले बगाएको थियो । त्यो क्षेत्रबाट कैयौ परिवार समेत विस्थापित भएका थिए। नेपाल भारत सीमाको मुख्य स्तभको रूपमा रहेको उक्त पिल्लर अहिलेसम्म समेत पुर्नस्थापित हुन नसकेको हो । लामो समयसम्म पिल्लर नराखिँदा भारतीयहरूले सीमा क्षेत्रमा चलखेल गर्दै आएको स्थानीयको आरोप छ।
उक्त सीमा स्तम्भ राख्न माग राख्दै स्थानीय प्रमुख जिल्ला अधिकारीमार्फत परराष्ट्रमन्त्रीको ध्यानाकर्षण गराइएको छ । तेज रावतसहितका स्थानीयले कञ्चनपुरका प्रमुख जिल्ला अधिकारी ९सीडीओ० गोपाल कुमार अधिकारीलाई ज्ञापनपत्र बुझाइएको हो । यतिका वर्षसम्म समेत मुख्य सीमा स्तम्भ पुर्नस्थापित गर्नमा राज्यको ध्यान जान नसकेपछि स्थानीयको नाताले सरकारको ध्यानाकर्षण गराएको रावतको भनाई छ ।उक्त क्षेत्रमा यतिबेला राष्ट्रिय गौरवको आयोजना बन्दैछ । महाकाली नदीमा चार लेनको पक्की पुल बन्नुका साथै बन्दरगाह समेत निर्माणाधीन अवस्थामा छ । सरकारले पुल र पक्की सडक धुमधामका साथ निर्माण गरिरहँदा मुख्य सीमा स्तम्भको समेत कुनै सोधीखोजी नभएको उनको भनाई छ ।
उक्त क्षेत्रबाट नेपाली कांग्रेस संसदीय दलका प्रमुख सचेतक रमेश लेखकले प्रतिनिधिसभा सदस्यको निर्वाचन जितेका हुन् । उनकै क्षेत्रमा रहेको मुख्य सीमा स्तम्भ बाढीले बगाएको यतिका वर्षसम्म बन्न नसकेको भन्दै त्यो क्षेत्रका स्थानीयले आक्रोश ब्यक्त गरेका छन् । उनीहरूले जति सक्दो चाँडो सीमा स्तम्भ पुर्ननिर्माण गर्न प्रमुख जिल्ला अधिकारीमार्फत सरकारको ध्यानाकर्षण गराएका हुन् । ज्ञापनपत्र बुझ्दै सीडीओ अधिकारीले उक्त क्षेत्रमा तत्काल निरीक्षण गरी आवश्यक गृहकार्य अगाडि बढाउने बताएका छन् ।