अछाम। अछाम साँफेबगर नगरपालिकाका नगर प्रमुख राजेन्द्रबहादुर कुँवरले आमावुवा गुमाएका वालवालिकालाई दशैं खर्च दिएका छन् । साँफेबगर नगरपालिकाका वडा नम्बर १ देखि १४ नम्बर वडाका आमाबुबा दुवै गुमाएका बालबालिकाहरूलाई आफूले पाउने सेवा सुविधाबाट दशैं खर्च उपलब्ध गराएका हुन्।
नगर प्रमुख कुँवरले १८ जना बालबालिकालाई ४५ हजार रकम आर्थिक सहयोग गरेका हुन्। एकजनालाई २ हजार ५ सयका दरले रकम उपलब्ध गराइएको महिला बालबालिका तथा जेष्ठ नागरिक शाखाका प्रमुख अनिता जोशीले जानकारी दिइन्। नगरभित्रका आफ्ना बालबालिकाहरूलाई दशैं मनाउन सहयोग गरेको नगर प्रमुख कुँवरले बताए।
उनले आफूले पाउने सेवा सुविधा सामाजिक कार्यमा खर्च गर्ने प्रतिबद्धता जनाएका छन्। यस्तै उद्यम विकास शाखाबाट उनिहरुलाई न्यानो कपडा समेत उपलब्ध गराइएको छ । दशैतिहारमा लगाउनको लागि न्यानो कपडा वितरण गरिएको छ । उक्त कार्यक्रममा साँफेबगर उपप्रमुख शिवबहादुर कुँवर शिलोज, महिला बालबालिका तथा जेष्ठ नागरिक शाखाका प्रमुख अनिता जोशी लगायतको सहभागिता रहेको थियो ।
