बाजुरा। बाजुराका अनेरास्ववियु केन्द्रीय सदस्य तथा विद्यार्थी नेता चेतन अयडीको शव आज नौ दिनपछि उठाइने भएको छ । अनेरास्ववियु केन्द्रीय सदस्य अयडीको शव आज सोमबार नौ दिनपछि उठाइने भएको नेकपा एमाले बाजुराका सचिव भरत थापाले बताए।
उनले मसिंर ४ गते प्रतिनिधिसभा र प्रदेशसभाको निर्वाचनपश्चात नेपाली कांग्रेसका कार्यक्रताद्वारा हत्या गरिएका भनिएका अयडीको शव बिहान श्रद्धाञ्जलीका लागि खुलामञ्चमा राखिने छ। त्यसपछि उनको शव दाहसंस्कारका लागि लगिने उनले जानकारी दिए । निर्वाचनका दिन घरभित्रबाटै अयडीलाई तानेर ल्याएर कांग्रेस कार्यकर्ताले निर्घात कुटपिट गरेको बताइएको छ । कुटपिटबाट घाइते भएका उनलाई उपचारका लागि अछामको बयलपाटा अस्पताल लगिएकोमा चिकित्सकले मृत घोषणा गरेका थिए।
बयलपाटा अस्पतालबाट ल्याएर पोष्टमार्टमका लागि चेतनको शव जिल्ला अस्पताल बाजुरामा राखिएको थियो। नेकपा एमाले बाजुराले चेतनका हत्यारा प्रक्राउ गरी दोषिमाथि कारबाहीको माग गर्दै मंसिर ५ गतेदेखि बाजुरामा आन्दोलन गरिरहेको छ। यस्तै त्रिवेणी नगरपालिका(७ स्थित नाटेश्वरी आधारभूत विद्यालय मतदान केन्द्रमा विवाद भई तनावपूर्ण स्थिति सिर्जना भएपछि सुरक्षाकर्मीले गोली समेत चलाएको थियो। सुरक्षाकर्मीले चलाएको गोली लागेर त्रिवेणी ७ का सञ्जिव अयडीको मृत्यु भएको थियो। गत शुक्रबार उनको दाहसंस्कार गरिसकिएको छ ।
