बाजुरा। बाजुराको गुम्बागाउँ मतदान केन्द्रमा ५५ जना मतदाता रहेका छन्। बाजुराको हिमाली गाउँपालिका ३ गुम्बामा रहेको मतदान केन्द्रमा सो संख्यामा मतदाता रहेका हुन् ।जिल्ला निर्वाचन कार्यालय बाजुराका प्रमुख नवराज अवस्थीले गत वैशाखमा सम्पन्न स्थानीय तह निर्वाचनमा ६० जना मतदाता रहेकोमा पाँच जना मृत्यु भएकाको नाम हटाउँदा ५५ जना कायम भएको जानकारी दिए।
बाजुरा जिल्लाका ७० वटा मतदान केन्द्रमा र ११२ मतदान स्थलहरु रहेका छन्। बाजुरामा सबैभन्दा कम मतदाता ५५ जना गुम्बा गाउँको मतदान केन्द्रमा रहेको जिल्ला निर्वाचन कार्यालय बाजुराले जनाएको छ। गुम्बा गाउँमा रहेको हिमाल भक्ति आधारभूत विद्यालयमा मतदान केन्द्र राखिएको छ। बाजुरा जिल्लाका ४३ मतदान केन्द्र अति संवेदनशीलको सूचीमा छन्। बाजुराका सहायक प्रमुख जिल्ला अधिकारी लोकेन्द्र विष्टले दिएको जानकारी अनुसार जिल्लाका जम्मा ७० मध्ये चार मतदानस्थल मात्रै सामान्य अवस्थाका छन्।
४३ वटालाई अति संवेदनशील र २३ वटालाई संवेदनशील मतदानस्थलको सूचीमा राखेको उनले जानकारी दिए। सहायक प्रमुख जिल्ला अधिकारी विष्टका अनुसार नेपाल प्रहरी, म्यादी प्रहरी, सशस्त्र प्रहरी र नेपाली सेना गरी करीव दुई हजार सुरक्षाकर्मी चुनावका लागि खटिएका छन्।बाजुरा जिल्लामा ८३ हजार ५६७ मतदाता छन्। बाजुराको सर्वाधिक विकटमा रहेको यो गाउँमा २०७४ सालको स्थानीय चुनावमा मतदान केन्द्र स्थापना भएको थियो। २०७४ सालको पहिलो चरणको स्थानीय चुनाव अगावै गुम्बा गाउँवासीले मतदान गर्न जाँदा बास बस्नुपर्ने बाध्यताको समाचार सार्वजनिक भएपछि निर्वाचन आयोगले गुम्बा गाउँको हिमाल भक्ति आधारभूत विद्यालयमा मतदान केन्द्र स्थापना गरेको थियो। २०७४ सालको स्थानीय चुनाव अघिसम्म वडा नम्बर ३ बौडीमा भोट हाल्न जानुपर्ने बाध्यता थियो। गुम्बा गाउँ र बौडी आउ–जाउ गर्न तीन दिन लाग्थ्यो। मानिसहरु बीच बाटोमा बास बस्दै भोट हाल्न जाने र फर्किने गर्दथे।
