दार्चुला। भारतीय पक्षले नेपालतर्फ महाकालीबाट ढुंगा उठाएपछि दार्चुलामा तनाव भएको छ ।भारतले दार्चुला सदरमुकाम खलंगास्थीत महाकाली नदी किनारमा तटबन्ध निर्माणको काम पुनः थालेको छ । भारतीय पक्षले स्काभेटरको प्रयोग गरेर तटबन्ध निर्माणका लागि नेपाली भूभागबाट ढुंगा लगेपछि दार्चुलास्थित सीमामा बुधबार तनाव उत्पन्न भएको हो ।
त्यसपछि स्थानीय नेपाली विरोधमा उत्रिएका छन्। बुधबार स्थानीयले ढुंगामुढा गरेका छन् भने व्याँस सडक पनि अवरुद्ध पारेका छन्। स्काभेटरको प्रयोग गरी नेपालबाट ढुंगा लैजान नपाउने र नेपाली भूभाग डुबाउने गरी तटबन्ध निर्माण भइरहेको भन्दै आक्रोशित स्थानीयले पारिपट्टी ढुंगा प्रहार समेत गरेका छन्। उनीहरुले यसकै विरोधमा व्यास सडक समेत अबरुद्ध गरेका थिए। दार्चुलाका प्रमुख जिल्ला अधिकारी दीर्घराज उपाध्यायले भारतीय समकक्षीसँग वार्ता गर्ने बताएपछि अबरुद्ध सडक सञ्चालनमा आएको छ।
भारतीय पक्षले लामो समयदेखि रोकेको तटबन्ध निर्माणको काम मंगलबारबाट पुनः सुरु गरेको छ। दार्चुला सदरमुकामको बंगाबगड क्षेत्र भन्दा ठिक पारि भारतले गतवर्षदेखि एकतर्फी रुपमा तटबन्ध निर्माण गरिरहेको छ। अन्तर्राष्ट्रिय कानूनलाई उल्लंघन गर्दै भारतले पटक–पटक सीमा क्षेत्रमा यस्ता गतिविधि बढाएपछि स्थानीय आक्रोशित छन्। भारतीय पक्षले लामो समयदेखि रोकेको तटबन्ध निर्माणको काम मंगलबारबाट पुनः सुरु गरेको थियो। आज भारतीय अधिकारीसँग जिल्ला प्रशासन कार्यालयमा तटबन्धबारे छलफल हुने जनाइएको छ।