बाजुरा। बाजुराको बुढीगंगा नगरपालिकामा पुनः मतदान गर्ने निर्वाचन आयोगको निर्णयप्रति विरोध गरिएको छ । निर्वाचन आयोगले बुढीगंगा नगरपालिकाका जनताको जनमतविरुद्ध निर्णय गरेको भन्दै विरोध गरिएको हो।
असार ३० गतेको स्थानीय तहको निर्वाचनमा मतदानको क्रममा धाँधलीको कुरा उठेपछि भएको भन्दै निर्वाचन आयोगले बिहीबार पुन: मतदान गर्ने निर्णय गरेको थियो। जनमतविरुद्ध निर्वाचन आयोग निर्णय गरेको भन्दै एमालेले अनिश्चितकालका लागि सडक अवरुद्ध गरेको छ । अहिले बाजुरा प्रवेश गर्ने एक मात्र सडक साफे मार्तडी अवरुद्ध गरिएको एमाले बुढीगंगा नगर अध्यक्ष नरेन्द्र थापाले बताए । देशभर नभएको निर्णय आयोगले बुढीगंगा नगरपालिकामा गरेको भन्दै उनले आक्रोश व्यक्त गरे ।
‘देशका सबै स्थानमा भएजस्तै गरी यहाँ निर्वाचन भएको हो । मतगणना गर्नुपर्नेमा आयोगले पुन मतदान गर्ने निर्णय गर्यो यो गलत हो’ उनले भने ‘जनमतविरुद्ध निर्णय फिर्ता नहुँदासम्म हामी आन्दोलन जारी राख्छौँ ।’ महान्यायाधिवक्ता खम्ब खातीका दाजु रङ्ग खाती कांग्रेसका तर्फबाट मेयरका उम्मेदवार बनेका छन् । उनलाई विजयी गराउने उद्देश्यले निर्वाचन आयोगले निर्णय गरेको थापाको आरोप छ । एमालेले निर्वाचन आयोगको निर्णयविरुद्ध सर्वोच्च अदालतमा जाने भएको छ । एमाले स्थायी कमिटी सदस्य तथा सुदूरपश्चिम प्रदेशका सहइन्चार्ज कर्ण थापाले आयोगको निर्णय न्यायोचित नभएको भन्दै अदालत जाने बताए । ‘निर्वाचन आयोगको निर्णय विभेदपूर्ण छ । विवाद भएको देशका अन्य पालिका मतगणना हुने यहाँ किन नहुने’ उनले भने ‘हामी सर्वोच्चमा जान्छौँ ।
’निर्वाचन आयोगको निर्णयप्रति एमाले मात्र होइन नेपाली कांग्रेस पनि रुष्ट भएको छ । कांग्रेस बाजुराका सभापति रामसिंह रावलले विवाद नभएको वडामा पनि पुन: मतदान गर्ने निर्णय गलत रहेको बताए । बाजुराका १० वडा मध्ये कांग्रेसले ४ र ७ नम्बर बडाको मतदान केन्द्र कब्जा गरेको एमालेको आरोप छ । यहाँ ९९ प्रतिशत मतदान भएको थियो । यसबाट पनि बुथ कब्जा गरेको तथ्य पुष्टि हुने एमालेको जिकिर छ । कांग्रेसले भने २,३ ५ र ९ वडाका बुथ एमालेले कब्जा गरेको आरोप लगाउँदै आएको छ । तर, १, ६ , ८ र १० नम्बरमा दुवै दलले शान्तिपूर्ण मतदान भएको बताइरहेका छन् । शान्तिपूर्ण मतदान भएको वडामा पनि पुन: मतदान गर्ने निर्णय उपयुक्त नभएको कांग्रेस सभापति रावलले बताए । ‘हामीले निर्वाचन आयोगको निर्णयलाई स्वीकार गर्न सक्दैनौँ’ उनले भने ‘हामीले भनेको भन्दा अन्य वडामा पनि पुन मतदान गर्ने कुरा लगत छ ।
शान्तिपूर्ण मतदान भएको वडामा पुन मतदान गर्नु हुँदैन ।’ विवाद बढेर मतगणना हुन नसकेपछि विवादबारे अध्ययन गर्न निर्वाचन आयुक्त सगुन सम्शेर जबरासहितको टोली नेपाली सेनाको हेलिकप्टरमा बाजुरा पुगेको थियो । तर, बाजुरामा भने राज्य शक्तिको दुरुपयोग गरेर पुन: मतदान गर्ने निर्णय गरिएको भन्दै विरोध भइरहेको हो । बैशाख ३० गते भएको स्थानीय तहको निर्वाचनमा सुरक्षा ब्यवस्थामा गम्भिर लापरवाही गरेकोले प्रमुख जिल्ला अधिकारी उपेन्द्रराज पौड्याल, प्रहरी प्रमुख डिएपी चतुरभुज ओझा र सशस्त्र प्रहरीका प्रमुख डिएपी दिपक बिष्टलाई तीन दिन भित्र हटाउन निर्णय गरेको छ।साँफे मार्तडी सडक अवरुद्ध गर्दै दिनेश थपलीया मुर्दावाद, निर्वाचन आयोग मुर्दावाद, परमादेशी सरकार मुर्दावाद, जिल्ला प्रशासन कार्यालय मुर्दावाद नारासहित नगरवासी सडममा उत्रेका छन्। यता जिल्ला प्रहरी कार्यालय बाजुरालाई सो चक्का जामबारे कुनै जानकारी नभएको डिएपी चतुरभुज ओझाले बताए।