कैलाली । धनगढी उपमहानगरपालिकामा गोपाल हमालको जित निश्चित बनेको छ । उपमहानगरपालिकामा १० हजार मत गन्न बाँकी रहदा हमालले ११ हजारको मतले अग्रता लिइरहेका छन् ।
सुदूरपश्चिम प्रदेशको एकमात्र उपमहानगरपालिकामा कांग्रेसका उम्मेदवार नृपबहादुर वड भन्दा ११ हजार ५९४ मतले अघि रहेका हमालको बाँकी रहेको मत गन्नु अगावै जित निश्चित भएको हो । अहिलेसम्मको मतगणना परिमाणअनुसार गणना भएको जम्मा मत ५३ हजार ५१ मध्ये हमालले २३ हजार ३८४ मत प्राप्त गरिसकेका छन् ।
त्यही, कांग्रेसका वडको मत ११ हजार ७४० छ भने एमालेका उम्मेदवार रणबहादुर चन्दको ६ हजार ६८९ रहेको छ । हमालले ११ हजार ५९४ मतले अग्रता लिइरहेका छन् । १९ वडा रहेको उपमहानगरपालिकामा ६३ हजार ७१५ मत खसेको थियो । अब गन्न बाँकी मत १० हजार ६६४ मात्रै रहेको अवस्थामा स्वतन्त्र उम्मेदवार हमालको जित निश्चित भएको हो । २०७४ को निर्वाचनमा हमाल कांग्रेसका वडसँग २ हजार ७९७ मतले पराजित भएका थिए ।