धनगढी । धनगढी उपमहानगरपालिकाले भोटेकोशी बाढीबाट प्रभावित तथा पीडित नागरिकको सहयोगका लागि ४१ लाख ११ हजार १११ रुपैयाँ आर्थिक सहयोग गरेको छ।
उपमहानगरपालिकाका अनुसार उक्त रकम प्रधानमन्त्री दैवीप्रकोप उद्धार कोषमा जम्मा गरिएको हो। बाढीबाट प्रभावित नागरिकको उद्धार, राहत तथा पुनःस्थापनामा सहयोग पुगोस् भन्ने उद्देश्यले उक्त रकम उपलब्ध गराइएको उपमहानगरपालिकाले जनाएको छ।
भोटेकोशीमा आएको बाढीका कारण विभिन्न क्षेत्रमा ठूलो जनधनको क्षति भएको र प्रभावित परिवारलाई तत्काल राहत तथा सहयोग आवश्यक रहेकाले स्थानीय तहका तर्फबाट सहयोग गरिएको उपमहानगरपालिकाको भनाइ छ।
विपद्को कठिन समयमा बाढीपीडित नागरिकप्रति ऐक्यबद्धता जनाउँदै धनगढी उपमहानगरपालिकाले आफ्नो तर्फबाट सहयोग गरेको जनाएको छ। नगरपालिकाले विपद्बाट प्रभावित नागरिकको राहत तथा पुनःस्थापनाका लागि सबै पक्षबाट सहयोग आवश्यक रहेको समेत बताएको छ।
