धनगढी: धनगढी उपमहानगरपालिका–३ चौराहामा “धनगढी सेकुवा तथा मार्सी खाना घर” सञ्चालनमा आएको छ। आज एक कार्यक्रमका बीच उक्त खाना घर औपचारिक रूपमा सञ्चालनमा ल्याइएको हो। नयाँ सञ्चालनमा आएको यस खाना घरले विभिन्न प्रकारका सेकुवाका परिकारसँगै अर्गानिक मार्सी चामलको भात ग्राहकलाई उपलब्ध गराउने लक्ष्य राखेको छ। स्थानीय स्वाद र परम्परागत परिकारलाई प्राथमिकता दिँदै व्यवसाय सुरु गरिएको सञ्चालक पक्षले जनाएको छ।

खाना घरको उद्घाटन कैलाली उद्योग वाणिज्य संघका वरिष्ठ उपाध्यक्ष केशव जोशी र सचिव प्रकाश कुमार चन्दले संयुक्त रूपमा गरेका हुन्। उद्घाटन पश्चात बोल्दै वरिष्ठ उपाध्यक्ष जोशीले नयाँ व्यवसायलाई सफलताको शुभकामना दिँदै स्थानीय स्तरमा रोजगारी सिर्जना गर्न खेलेको भूमिकाको प्रशंसा गरे। उनले व्यवसाय विस्तारसँगै आर्थिक गतिविधि चलायमान बनाउन यस्ता पहल महत्वपूर्ण हुने उल्लेख गर्दै कैलाली उद्योग वाणिज्य संघ सधैं साथमा रहने प्रतिबद्धता व्यक्त गरे। “यस्ता किसिमका व्यवसायहरूले स्थानीय उत्पादनको प्रवर्द्धन गर्नुका साथै युवाहरूलाई स्वदेशमै केही गर्ने प्रेरणा दिन्छन्। हामी सधैं उद्यमीहरूको साथमा रहनेछौं।”

यसैगरी, खाना घरका सञ्चालक अर्जुन भुषालले अर्गानिक मार्सी चामलको भातलाई मुख्य आकर्षणका रूपमा प्रस्तुत गरिने बताए। उनले पछिल्लो समय युवाहरू विदेशतर्फ आकर्षित भइरहेका बेला स्वदेशमै केही नयाँ र फरक गर्ने सोचका साथ व्यवसाय सुरु गरिएको उल्लेख गरे। भुषालका अनुसार ग्राहकलाई गुणस्तरीय सेवा प्रदान गर्दै परम्परागत स्वादलाई आधुनिक ढंगले प्रस्तुत गर्ने लक्ष्य रहेको छ। “विभिन्न सेकुवाका परिकारसँगै अर्गानिक मार्सी हाम्रो विशेष आकर्षण हुनेछ,” उनले भने।

स्थानीय उत्पादनको प्रयोग र परम्परागत नेपाली खानालाई प्रवर्द्धन गर्ने उद्देश्यसहित सञ्चालनमा आएको यो खाना घरले धनगढीका खाद्य पारखीहरूका लागि नयाँ विकल्प थप्ने विश्वास गरिएको छ।