धनगढी । प्रदेशस्तरीय सुरक्षा तयारीका लागि गृहमन्त्री ओमप्रकाश अर्याल सोमबार धनगढी पुगेका छन्। मंसिर १६ गतेदेखि सुरु हुने सुदूरपश्चिम प्रदेशस्तरीय सुरक्षा गोष्ठीमा सहभागी हुन मन्त्री अर्याल बिहान हवाई मार्गबाट धनगढी विमानस्थल अवतरण गरेका हुन्। मन्त्री अर्याललाई धनगढी आगमनका क्रममा कैलालीका प्रमुख जिल्ला अधिकारी, सुरक्षा निकायका प्रदेश प्रमुख तथा स्थानीय प्रशासनका अधिकारीहरूले विमानस्थलमै औपचारिक स्वागत गरेका थिए।

सरकारले आगामी फागुन २१ गतेका लागि प्रतिनिधि सभा सदस्य निर्वाचन घोषणा गरिसकेको छ। यही निर्वाचनको तयारी, सुरक्षा चुनौती र समन्वयलाई प्रभावकारी बनाउने उद्देश्यले गृह मन्त्रालयले प्रदेश–प्रदेशमा सुरक्षा गोष्ठी आयोजना गर्दै आएको छ। यसैअनुसार धनगढीमा सुदूरपश्चिम प्रदेशस्तरीय गोष्ठी आयोजना गरिएको हो। यस्तै, गृहसचिव तथा विभिन्न सुरक्षा निकाय—नेपाल प्रहरी, सशस्त्र प्रहरी, राष्ट्रिय अनुसन्धान विभागका उच्च अधिकारीहरू पनि क्रमशः धनगढी आउने कार्यक्रम छ। उनीहरू सहभागी भएर प्रदेशको सुरक्षा सम्बद्ध गतिविधि, तयारी र समस्याबारे प्रत्यक्ष अवलोकन गर्नेछन्।

गोष्ठीमा सुदूरपश्चिम प्रदेशका तर्फबाट व्यापक सुरक्षा प्रतिवेदन पेस गरिने बताइएको छ। प्रतिवेदनमा प्रदेशको समग्र शान्ति–सुरक्षाको वर्तमान अवस्था, बढ्दै आएका चुनौती, अपराध नियन्त्रणका उपाय, नाकाबन्दी तथा तस्करी नियन्त्रण, सीमा सुरक्षाको प्रभावकारी रणनीति लगायतका विषय समेटिनेछन्। बैठकमा विशेषगरी भारतसँगको खुला सीमाले सिर्जना गर्ने जोखिम, आपराधिक समूहको गतिविधि, चुनावी समयमा बढ्ने सम्भावित तनाव, स्थानीय तहसँगको समन्वय, सुरक्षा निकायबीचको सहकार्य, संवेदनशील क्षेत्रको पहिचान तथा जोखिम व्यवस्थापनका विषयमा गहिरो छलफल हुने बुझिएको छ।

गृहमन्त्रालयको निर्देशनअनुसार, गोष्ठीबाट प्राप्त निष्कर्ष र सुझावहरूलाई आगामी निर्वाचनका लागि तयार गरिने कार्ययोजनामा समावेश गरिनेछ। गोष्ठी सकिएपछि मन्त्री अर्यालले प्रदेशको सुरक्षा तयारीबारे अवलोकन रिपोर्ट तयार पार्ने र काठमाडौँ पठाउने कार्यक्रम छ। सुरक्षा निकायले यसलाई आगामी चुनावलाई शान्तिपूर्ण, सहज र निष्पक्ष बनाउन महत्वपूर्ण तयारीको रूपमा लिएको छ।