धनगढी। धनगढीस्थित लोटस क्याफेले आफ्नो स्थापना दिवसको अवसर पारेर सामाजिक उत्तरदायित्वको उदाहरण प्रस्तुत गर्दै मानवसेवा आश्रमलाई सहयोग गरेको छ। क्याफेका सञ्चालक टंक कठायत र खेमनाथ योगीको नेतृत्वमा क्याफे परिवार आश्रममै पुगेर खाद्यान्न सामग्री तथा नगद सहयोग प्रदान गरेको हो। सहयोग हस्तान्तरण कार्यक्रममा सञ्चालक टंक कठायतले व्यवसाय केवल नाफामुखी मात्र नभई सेवामुखी पनि हुनुपर्ने मान्यताका साथ लोटस क्याफे सञ्चालन हुँदै आएको बताउनुभयो। उहाँका अनुसार स्थापना कालदेखि नै लोटस क्याफेले हरेक वर्ष विभिन्न सामाजिक संघ–संस्थाहरू, विशेषगरी असहाय तथा बेसहारा व्यक्तिहरूको सेवामा क्रियाशील संस्थाहरूलाई सहयोग गर्दै आएको छ। “समाजबाटै पाएको मायालाई समाजमै फर्काउनु हाम्रो दायित्व हो,” उहाँले भन्नुभयो।

मानवसेवा आश्रमका प्रतिनिधिहरूले लोटस क्याफे परिवारप्रति धन्यवाद व्यक्त गर्दै निजी क्षेत्रबाट यस्ता मानवीय सहयोगले आश्रममा आश्रित व्यक्तिहरूको जीवनयापनमा ठूलो राहत पुग्ने बताएका छन्। यसैबीच, लोटस क्याफेले आफ्नो ७ औँ वार्षिकोत्सवको अवसरमा ग्राहकहरूका लागि विशेष अफर पनि सार्वजनिक गरेको छ। क्याफेमा आजभरि उपलब्ध सबै किसिमका बिलमा १५ प्रतिशत छुट प्रदान गरिने क्याफे व्यवस्थापनले जनाएको छ। यस छुट अफरमार्फत ग्राहकहरूप्रति आभार व्यक्त गर्नुका साथै स्थापना दिवसलाई उत्सवका रूपमा मनाउने उद्देश्य रहेको सञ्चालक कठायतले जानकारी दिनुभयो।

स्थापना दिवसको रौनकलाई अझ बढाउन आज साँझ ५ बजेदेखि लाइभ म्युजिकको समेत व्यवस्था गरिएको छ। लाइभ म्युजिकका साथ स्वादिष्ट परिकारको आनन्द लिन ग्राहकहरूलाई लोटस क्याफेले विशेष आमन्त्रण गरेको छ। सामाजिक सेवासँगै गुणस्तरीय सेवा, स्वाद र वातावरणका कारण लोटस क्याफे धनगढीका क्याफे प्रेमीहरूबीच लोकप्रिय बन्दै आएको छ। स्थापना दिवसको अवसरमा गरिएको सामाजिक सहयोग र आकर्षक अफरले क्याफेप्रतिको विश्वास अझ बलियो बनाउने अपेक्षा गरिएको छ।