बैतडी। बैतडी बस दुर्घटनामा घाईते भएका २५ जना डिस्चार्ज भएका छन् भने ६ जना धनगढी रेफर गरिएको छ।सोमबार ४४ जना सवार रहेको बस बैतडीको मेलौली नगरपालिका वडा नम्बर–७ सुवाखानीमा दुर्घटनामा परि घाइते भएकाहरु मध्ये २५ जनालाई डिस्चार्ज गरिएको प्रहरीले जनाएको छ।

मेलौलीको केशरपुर प्राथमिक स्वास्थ्य केन्द्रमा सामान्य उपचारपछि थप उपचारका लागि डडेल्धुरा पठाइएका २५ जनालाई उपचारपछि डिस्चार्ज गरिएको जिल्ला प्रहरी कार्यालय बैतडीका प्रवक्ता, प्रहरी निरीक्षक योगेश खत्रीले बताए। यस्तै ६ जनालाई थप उपचारका लागि धनगढी रेफर गरिएको छ।

तीमध्ये एक जनाको मेलौलीमै मृत्यु भएको छ। दुर्घटनामा पञ्चेश्वर गाँउपालिका–६ का २८ वर्षीय उमेश भण्डारीको मेलौलीको केशरपुर प्राथमिक स्वास्थ केन्द्रमा उपचारका क्रममा मृत्यु भएको थियो।दुर्घटनामा घाइते भएका गोरख साउँद, मानविर साउँद, संगीता रावत, दिपीका भट्ट , विसन भट्ट र बस चालक देव सिंह भण्डारीलाई डडेल्धुरा अस्पतालबाट थप उपचारका लागि धनगढी पठाइएको खत्रीले जानकारी दिए।

बाँकी घाइतेहरुको डडेल्धुरा अस्पतालमा उपचार भइरहेको छ। पञ्चेश्वर गाँउपालिका–३ कुलाउँबाट महेन्द्रनगर जाँदै गरेको लु २ ख २०११ नम्बरको बस सोमवार दिउँसो १ बजे दुर्घटनामा परेको थियो। सडकबाट ५० मिटर तल खसेको बस रुखमा अड्किएको छ। ओरालो सडकमा बस अनियन्त्रित भएर दुर्घटना भएको प्रहरीले जनाएको छ। दुर्घटनाका सम्बन्धमा प्रहरीले आवश्यक अनुसन्धान गरिरहेको छ।