कैलाली। केहि दिन यता बच्चा चोर्ने गिरोह सक्रिय रहेको खबरहरु सामाजिक संजालमा फैलिएका छन् । कतीपयले सामाजिक संजालमा यस्ता फोटो र भिडियोहरु राखेर सावधानी अपनाउन अनुरोध गरिएका सामाग्री राखिएका छन। कसैले भारतबाट बच्चा चोर्ने गिरोह नेपाल छिरेर कैलालीमा पनि प्रवेश गरेको भनेर सञ्जाल प्रयोगकर्ताहरुले फोटोसहितका पोस्टहरु सामाजिक संजालमा सार्वजनिक गरिरहेका छन्।
जस कारण पनी यस क्षेत्रमा मानिसहरुमा त्रासको वातावरण पनि सृजना भएको छ। मानिसहरुले आफ्ना बच्चाहरुलाई सुरक्षित राख्न र भारतबाट माग्न आउनेबाट सावधान हुन अनुरोध गरिरहेका छन ।यस्तै प्रहरीले भने भारतबाट बच्चा चोर्ने गिरोह नेपाल छिरेर कैलालीमा पनि प्रवेश गरेको भनेर पुष्टि हुन नसकेको जनाएको छ। जिल्ला प्रहरी कार्यालय कैलालीका प्रवक्ता वेदप्रकाश जोशीले सामाजिक संजालमा यस्ता कुरा देखिएपनि कैलालीमा नै यस्तो समुह आएको छ भनेर पुष्टि गर्ने आधार फेला नपरेको जानकारी दिए।

उनले भने ‘हामीलाई यस्तो सूचना आएको छैन।’सामाजिक संजालमा हालेको देखीयो। उनले भने, सामाजिक संजालमा यस्तो लेख्नेले जिम्मेवारी बोध गरेर कुन ठाउँमा यस्ता मानिस देखिए भनेर खबर गरिदिए हुन्थ्यो। यस्ता सुचनाले मानिसहरुमा त्रास बढाएको उनको भनाई छ । उनले पुर्वी नेपालमा यस्ता घटना घटेको भिडियो देखिए पनि यस क्षेत्रमा भने अहिले सम्म यस्तो घटना भएको पुष्टि नभएको बताए । यदि कुनै ठाउँमा त्यस्ता संकास्पद व्यक्ति भेटिए प्रहरीलाई सूचना दिन कैलाली प्रहरीले अनुरोध समेत गरेको छ ।