कैलाली। नेपाली काँग्रेसकी नेतृ डाक्टर आरजु राणा देउवा कैलाली निर्वाचन क्षेत्र नम्बर ५ बाट चुनाव लड्ने लगभग निश्चित भएको छ। मंसीर ४ गते देश भरी एकै चरण प्रतिनिधि र प्रदेश सभाको चुनाब गर्ने निर्णय गरिएसँगै आरजु राणा देउवा कैलाली निर्वाचन क्षेत्र नम्बर ५ बाट चुनाव लड्ने लगभग निश्चित भएको नेपाली काँग्रेसका नेताहरुले बताएका छन।
कैलालीको प्रतिनिधि सभा क्षेत्र नम्बर ५ लाई पनि निकै महत्वका साथ हेरीएको छ। क्षेत्र नम्बर ५ बाट २०७४ सालको निर्वाचनमा नेकपा (एमाले) का नेता नारदमुनी रानासंग प्रधानमन्त्री शेरबहादुर देउवा पत्नी समेत रहेकी नेपाली काँग्रेसकी नेतृ डाक्टर आरजु राणा देउवा ४ हजार ८८० मतान्तरले पराजित भएकी थिइन् । एमालेका रानाले २७ हजार २०२ मत प्राप्त गरेका थिए। नेपाली काँग्रेसबाट निर्वाचनमा लेडेकी डाक्टर आरजु राणा देउवाले २२ हजार ३२२ मत ल्याएकी थिइन्। नेपाली काँग्रेस कैलालीका सभापति नारयण दत्त भट्टले डाक्टर आरजु राणा देउबा कैलाली क्षेत्र नम्बर ५ बाट चुनाब लड्ने निश्चित भएको बताएका छन् ।
