धनगढी । सुदूरपश्चिम सरकारका पूर्वमन्त्री तथा कैलाली क्षेत्र नम्बर ५ (२)बाट प्रदेश सभा सदस्यमा निर्वाचित प्रकाश देउवा गत भदौमा भएको जेनजी आन्दोलनपछि अमेरिका पलायन भएका छन् ।
अमेरिका गएको करिब ७ महिनासम्म पनि उनी नफर्किएपछि विभिन्न अड्कलवाजी हुन थालेको छ । कैलाली–५(२) का मतदाता भने आफ्नो क्षेत्रका समस्या प्रदेश सभामा उठाउनुपर्ने जनप्रतिनिधि नै विदेश पलायन भएको भन्दै चिन्ता प्रकट गर्दछन् ।
चुनावका बेला देउवाले धनगढीको मुहार फेर्ने र यहाँ मोनोरेल गुडाउने आकर्षक सपना बाँडेका थिए । प्रदेशको भौतिक पूर्वाधारमन्त्री हुँदा उनले धनगढीको मुख्य सडक विस्तारका लागि बजेट छुट्ट्याए, सडक पनि बन्यो । यद्यपि पछिल्लो समय उनी अचानक विदेश पलायन भएपछि भने यस क्षेत्रका मतदातामा चासो बढेको छ ।
जेनजी आन्दोलनका बिच उनी सुटुक्क अमेरिका उडेका थिए । त्यसयता उनी सुदूरपश्चिम फर्किएका छैनन् । एक बहालवाला सांसद सात महिनासम्म मुलुकबाहिर रहँदा न उनको पार्टी नेपाली कांग्रेसलाई आधिकारिक जानकारी छ, न त प्रदेशसभा सचिवालयलाई नै ।
लामो समयको अनुपस्थितिले देउवाको सांसद पद नै जोखिममा पर्ने सम्भावना बढेको छ । सुदूरपश्चिम प्रदेश सभा नियमावली २०८० को धारा १९३ अनुसार कुनै पनि सदस्य लगातार १० वटा बैठकमा सूचनाविना अनुपस्थित भएमा उसको पद रिक्त हुने व्यवस्था छ । देउवा अनुपस्थित भए यता प्रदेश सभाका सात वटा बैठक सञ्चालन भइसकेका छन् । यदि उनी थप तीन बैठकमा पनि अनुपस्थित भए भने उनको सांसद पद कानुनी रूपमै धरापमा पर्नेछ ।
‘उहाँ अमेरिकामा हुनुहुन्छ भन्ने सुनिन्छ, तर दलको सम्पर्कमा हुनुहुन्न । जाने बेला कसैलाई औपचारिक जानकारी दिनुभएन । हामीलाई पनि धेरै केही जानकारी छैन,’ कांग्रेसका एक नेताले भने ।
पछिल्लो समय देउवा परिवारका सदस्यहरू विदेश आउजाउ निकै बाक्लिएको छ । पूर्वप्रधानमन्त्री शेरबहादुर देउवा र उनकी पत्नी आरजु राणा देउवा हाल हङकङमा छन् । सिङ्गापुरमा स्वास्थ्य उपचार गराएपछि उनीहरू हङकङ पुगेका हुन् ।
भदौको ‘जेनजी’ आन्दोलनका क्रममा बुढानीलकण्ठस्थित घरमै प्रदर्शनकारीको आक्रमणमा परी घाइते भएका देउवा दम्पती त्यसयता पटक–पटक उपचारका लागि विदेश धाइरहेका छन् । उनका छोरा जयवीर सिंह देउवा लामो समयदेखि विदेशमै छन् भने अर्का भतिज भानु देउवा भर्खरै मात्र सिंगापुरबाट स्वदेश फर्किएका छन् ।
