धनगढी: कैलालीको गोदावरी नगरपालिका– ३ मा रहेको मालाखेती अस्पतालमा सर्पदंश उपचार सेवा विस्तार गरिने भएको छ । नगरपालिकाको १५औ नगरअधिवेशनले मालाखेती अस्पतालमा आगामी आर्थिक वर्षदेखी सर्पदंश उपचार सेवा विस्तार गरिने निर्णय गरेको हो । अधिवेशनमा आगामी आर्थिक वर्ष २०८२/०८३ को नीति, कार्यक्रम तथा बजेट प्रस्तुत गर्दै नगरप्रमुख विरेन्द्र भट्टले सर्पको टोकाईबाट अकालमै ज्यान गुमाउनुपर्ने बाध्यात्मक परिस्थीति हटाउन मालाखेती अस्पतालमा सर्पदंश उपचार सेवा विस्तार गर्ने निर्णय गरिएको बताए ।
नगरको ओलानी क्षेत्रमा सर्पको त्रास बढी हुने गरेको छ । वर्षेनी सर्पको टोकाईबाट अकालमै ज्यान गुमाउनुपर्ने बाध्यता त्यहाँका नागरिकहरुले भोग्दै आएका छन । तसर्थ वडाभेलामा पनि वडाध्यक्षहरुले मालाखेतीमा सर्पदंश उपचार सेवा हुनुपर्ने माग गरेका थिए । सो मागलाई सम्बोधन गर्दै आगामी आर्थिक वर्षको बजेटमा मालाखेती अस्पतालमा सर्पदंश उपचार सेवा विस्तार गरिएको नगरप्रमुख भट्टको भनाई छ ।
