काठमाडौं। राष्ट्रिय स्वतन्त्र पार्टीकी सांसद सोविता गौतम विवाह वन्धनमा बाँधिएकी छन्। उनले आफ्नो प्रेमी तथा ब्यवसायी गृहेन्द्र घिमिरेसँग विवाह गरेकी हुन्। काठमाडौं क्षेत्र नम्बर २ बाट निर्वाचित सांसद सोबिता र गृहेन्द्रले ७ जेठमा दुवै परिवारका सीमित सदस्यको उपस्थितिमा विवाह गरेका हुन्।
सोबिता हाल पार्टीको कामको सिलसिलामा जापान भ्रमणमा छिन्। उनीसँग विवाह गरेका गृहेन्द्र हिमालयन बिल्डर्सका डाइरेक्टर र ग्रिस्मा ब्रोडकास्टिङका अध्यक्ष हुन्। स्रोतका अनुसार माओवादीमा आवद्ध घिमिरे र सोविता लामो समयदेखि प्रेममा थिए। चितवन घर भएका गृहेन्द्र माओवादी अध्यक्ष तथा प्रधानमन्त्री पुष्पकमल दाहाल प्रचण्डसँग पारिवारिक रूपमा नजिक छन्। घरमा पूजा लगाएका बेला सानो जमघटमा उनीहरु प्रणयसुत्रमा बाँधिएको बुझिएको छ।
विवाहपश्चात दुवैजना जापान लागेका छन्। सोविताले आफू केही दिनका लागि जापान जान लागेको पार्टीलाई जानकारी गराएकी थिइन्। व्यक्तिगत प्रयोजनले जान लागेको भनेर सन्देश पठाएको पार्टी स्रोतले बतायो। उनले विवाह गरेको विषयमा भने जानकारी दिएकी छैनन्। सोविता र गृहेन्द्र प्रेम सम्वन्धमा रहेको रास्वपाका सीमित नेताहरुलाई थाहा थियो। अचानक विवाहको खबरले उनीहरु पनि चकित परेका छन्।सोविताकी बहिनी प्रकृतिले दिदीको विवाह भएको पुष्टी गरिन्। तर, थप जानकारी दिन चाहिनन्।
पारिवारिक स्रोतका अनुसार भक्तपुरको कमेरेटारस्थित सोबिताको माइतीघरमा आयोजित धार्मिक अनुष्ठानकै अवसरमा गत साता वैवाहिक विधि पूरा गरिएको हो। दुवै पक्षले विवाहका तस्विरहरु सार्वजनिक गरेका छैनन्।गृहेन्द्र गृष्मा ब्रोडकास्टिङको चेयरपर्शन हुन्। उनले सातवटै प्रदेशमा सप्तरङ्ग इभेन्ट आयोजना गर्दै आइरहेका छन्। २८ वर्षिया सोविता गत मंसिरमा भएको आमनिर्वाचनमा प्रत्यक्षतर्फ काठमाडौं–२ बाट विजयी भएकी हुन्। उनले प्रतिनिधिसभामा प्रभावशाली भूमिका खेल्दै आएकी छन्।रास्वपाको बौद्धिक र जुझारु युवा अनुहारमा उनको नाम आउँछ। उनी कानूनकी विद्यार्थी हुन्। विगतमा टेलिभिजन कार्यक्रमको प्रस्तुतकर्ता र निर्माताका रुपमा पनि उनले काम गरेकी थिइन्।