धनगढी। अविरल वर्षापछि आएको बाढीले कैलालीमा १ घर बगाएको छ भने १ सय ३८ बढी घर डुवानमा परेका छन्।

जिल्ला प्रशासन कार्यालय कैलालीका अनुसार गोदावरी नगरपालिका–४ स्थित गोदावरी नदीमा बाढी आउँदा कैलाली-कंचनपुर जोड्ने काठे पुल, दुर्गा मन्दिरस्थित गणेशदत्त पाण्डेको इँटाले बनेको टिनले छाएको १ कोठे किराना पसल र काठले बनेको टिनले छाएको प्रतिक्षालय बगाएको छ ।

त्यस्तै धनगढी उपमहानगरपालिका ३ र कंचनपुरको बाईसेविचुवा जोड्ने मोहना नदीमा निर्माणाधिन पक्किपुलको दुबै किनारको माटो बगाउदा आवागमन ठप्प भएको छ । त्यस्तै कैलारी गाउँपालिका ७ छटकपुर बसन्ता गाउँमा कटैनी नदीमा आएको बाढी पस्दा झण्डौ तीन दर्जन घरहरू डुबानमा परेका छन् । नदीमा आएको बाढी ३० बढी घरमा पसेको स्थानीय जीया चौधरीले जानकारी दिए ।

त्यस्तै कटैनी नदीको बाढी वडा नम्बर ७ अन्र्तगत बर्का बसन्ता, भुँइयाँफाँटा र रामपुर गाउँमा समेत पसेको बताइएको छ । यता जानकी गाउपालिका ४- का ८० घर र जानकी ७ का ५८ घरघुरीमा पनि पानी पसेको छ। जहाँ उद्दारका लागि सशत्र प्रहरीको टोली खटिएको प्रशासन कार्यालयले जनाएको छ । यस्तै,पहिरोले घर पुरिदा लम्कीचुहा नगरपालिकामा दुईजना घाइते भएका छन् । लम्कीचुहा नगरपालिका(३ बल्चौरमा बिहीबार राति घरमाथिबाट खसेर पहिरोले ७५ वर्षीय गोपाल चौधरी र उनकी श्रीमती ७२ वर्षीय गौरी चौधरी घाइते भएको जिल्ला प्रशासन कार्यालयले जनाएको छ ।

घाइते दुवै जनाको स्थानीय मेडिकलमा उपचार भइरहेको छ । यस्तै अविरल वर्षापछि गोदावरी नदीले कटान गरेर गोदावरी नगरपालिका-४ रहेको काठे पुले र ४२ वर्षीय गणेशदत्त पाण्डेको टीनले छाएको एक कोठे किराना पसल र प्रतिक्षालय बगाएको छ । गोदावरी नगरपालिका-१२ हलौडेमा स्थानीय मानबहादुर धामीले ५-६ कठ्ठामा लगाएको धानबाली नष्ट गरेको छ । जिल्ला प्रशासन कार्यालय कैलालीका सूचना अधिकारी शिवराज जोशीले बाढीले पुर्‍याएको क्षतिको विवरण संकलन गर्ने र उद्दार गर्ने काम भैरहेकोले क्षतिको यकिन विवरण आइनसकेको बताए ।