धनगढी। अखिल नेपाल फुटबल संघ अन्तर्गत कैलाली जिल्ला फुटबल संघका अध्यक्ष मोहित कुमार शाह हतियारसहित पक्राउ परेका छन । ४६ बर्षे शाहसँग अर्का एक जना खेमराज चौधरीपनि पुलिसको हिरासतमा रहेका छन । साउन २५ गतेराति करिव १२ बजे गौरीगंगा नगरपालिका वडा नम्वर ९ शंकरपुरमा पुलिसले जाँच गर्दा दुबैजना हतियारसहित पक्राउ परेका हुन ।

हाल पुलिस हिरासतमा रहेका शाह कैलाली जिल्ला फुटबल संघको अध्यक्ष हुन । उनी आफ्नो जग्गा भएको ठाउँमा सिकार गर्नका लागि गएका बेला समातिएको बताइएको छ । तर उनीसँग भएको हतियारको लाइसेन्स भए नभएको बारेमा पुलिसले खुलासा गरेको छैन ।

दुबैजनालाई पुलिसले हातहतियार र खरखजाना मुद्दा दर्ता गरेर थप अनुसन्धानमा राखिएको छ । प्रारम्भिक अनुसन्धानको क्रममा १२ बोर एक थान,सोको कार्टिज एक थान खेम राज चौधरीको र पोईन्ट टु टु एक थान, सोको गोली १० राउण्ड मोहित कुमार शाहको भन्ने खुल्न आएको कैलालीका प्रहरी नायब उपरीक्षक प्रतीक बिष्टले बताएका छन ।

इलाका प्रहरी कार्यालय मसुरिया कैलालीको टोलीले दुई जनालाई हतियारसहित पक्राउ गरेको छ । पूर्व(पश्चिम राजमार्गमा पश्चिमबाट पूर्वतर्फ गईरहेको बा १७ च १३१२ नम्बरको जिपभित्र लुकाइ राखिएको १२ बोर एक थान, सोको कार्टिज एक थान र पोईन्ट टु टु एक थान र त्यसको १० राउण्ड गोली बरामद गरेको हो ।