धनगढी:  धनगढी उपमहानगरपालिकाले धनगढीवासीको स्वास्थ्य, शान्ति र प्रगतिका लागि बडीमालिका मन्दिरमा आयोजना गर्दै आएको सरकारी पूजाका क्रममा यस वर्ष पनि पूजा टोली बाजुरातर्फ प्रस्थान गरेको छ। उपमहानगरपालिकाले गत वर्षदेखि बडीमालिका मन्दिरमा सरकारी पूजा गर्ने परम्परा सुरु गरेको हो।

सरकारी पूजा तथा बडीमालिका दर्शनका लागि भदौ ५ गते धनगढीबाट टोली बाजुरातर्फ प्रस्थान गरेको थियो। टोलीसँगै धनगढी उपमहानगरपालिकाका मेयर गोपाल हमाल पनि बडीमालिका दर्शन तथा पूजाका लागि यात्रामा सहभागी भएका थिए। यात्राका क्रममा बाजुराको फूल चढाउने स्थान पार गरी सोता पाटन नजिक करिब ३ हजार ४ सय ५० मिटर उचाइमा पुगेपछि मेयर हमाललाई स्वास्थ्य समस्या देखिएको थियो। उच्च उचाइका कारण श्वासप्रश्वासमा कठिनाइ हुनुका साथै शरीरमा अक्सिजनको मात्रा कम भएपछि उनलाई ‘लेक लाग्ने’ समस्या देखिएको बताइएको छ।

स्वास्थ्यमा समस्या देखिएपछि हमाललाई थप जोखिम हुन नदिन भदौ ८ गते बिहान उक्त स्थानबाट तलतर्फ फर्काइएको हो। उच्च हिमाली क्षेत्रमा अक्सिजनको कमीका कारण देखिएको समस्यापछि उनलाई सुरक्षित स्थानतर्फ फर्किएको हमालले सामाजिक सञ्जाल मार्फत जानकारी गराएका छन् । मेयर हमाल फर्किए पनि सरकारी पूजा टोलीका अन्य सदस्य भने बडीमालिका मन्दिरतर्फको यात्रा जारी राखेका छन्। टोलीले निर्धारित कार्यक्रमअनुसार बडीमालिका मन्दिरमा पुगेर धनगढी उपमहानगरपालिकावासीको स्वास्थ्य, शान्ति, समृद्धि र प्रगतिका लागि सरकारी पूजा तथा दर्शन गर्ने कार्यक्रम रहेको छ।

धनगढी उपमहानगरपालिकाले गत वर्षदेखि बडीमालिका मन्दिरमा सरकारी पूजा गर्ने कार्यक्रमलाई निरन्तरता दिँदै आएको छ। धार्मिक तथा सांस्कृतिक महत्व बोकेको बडीमालिका क्षेत्रमा हुने यस पूजालाई उपमहानगरपालिकाले नगरवासीको सुख, शान्ति, समृद्धि र प्रगतिका लागि गरिने विशेष पूजाका रूपमा लिएको छ।

बडीमालिका क्षेत्र समुद्री सतहबाट उच्च उचाइमा रहेकाले त्यहाँ पुग्ने यात्रुमा उचाइका कारण टाउको दुख्ने, श्वासप्रश्वासमा समस्या हुने, शरीरमा अक्सिजनको मात्रा घट्ने लगायतका समस्या देखिन सक्ने चिकित्सकहरूले बताउँदै आएका छन्। त्यसैले उच्च हिमाली क्षेत्रमा यात्रा गर्दा स्वास्थ्य अवस्थाको विशेष ख्याल गर्नुपर्ने हुन्छ।

यस वर्ष पनि सरकारी पूजा टोलीले कठिन हिमाली बाटो पार गर्दै बडीमालिका मन्दिरतर्फ यात्रा गरिरहेको छ। मेयर हमाल स्वास्थ्यमा समस्या देखिएपछि फर्किए पनि टोलीका अन्य सदस्यले भने निर्धारित धार्मिक कार्यक्रमलाई निरन्तरता दिएका छन्।